Oinarriak

GUTXIENEKOAK

Azoka 12 eta 18 urte bitarteko gazteentzat da. Taldeka hartu behar da parte, gutxienez bi eta gehienez lau kidez osatutako taldetan.

Lanak euskaraz, gaztelaniaz zein ingelesez egin eta aurkez daitezke, eta izena ematerako orduan ez dago proiektua definitua izan beharrik, inspirazio-fasea horretarako dago eta.

Parte hartzeko ez dago ordaindu beharrik.

 

Gaia librea da, eta bi modalitate hauetako bat aukeratu behar da:

  • Ikerketa-proiektua: aukeratutako arazo edo galdera bati konponbidea edo erantzuna emango dion ikerketa-lan bat garatzea.
  • Proiektu teknologikoa: aukeratutako erronkari edo arazoari irtenbidea emango dion produktu teknologiko bat diseinatzea/gauzatzea.

 

BILBOKO AZOKAREN EGUNERAKO TOKIA ESKATU AURRETIK BETE BEHARREKOA

Bilbon egiten den azokarako lekua eskatzeko, beharrezkoa da gutxienekoak betetzea eta ikasturtean zehar dokumentu hauek bidaltzea, egutegian zehaztutako epeak errespetatuta:

1.- Erronkaren hautaketa (laguntza nahi izanez gero, erabili txantiloi hau)

2.- Egin beharreko lanaren plangintza-txostena (laguntza nahi izanez gero, erabili txantiloi hau)

3.- Amaierako txostena (laguntza nahi izanez gero, erabili txantiloi hau)

 

FASEAK

 

Zientzia Azoka ez da lehiaketa bat, elkarlanean oinarritutako bizipen aberasgarri bat baizik. Fase hauetan murgiltzen dira gazteak urritik Azokara:

  • Inspirazio-fasea eta erronkaren hautaketa: Erronka edo ikerketa-gaia identifikatu dute gazteek. Talde bakoitzak garrantzitsua iruditu zaion arazo edo galdera bat aukeratu du, eta aukera horren arrazoiak azaldu ditu.
  • Egin beharreko plangintza txostena eta ikertzaileekin kontaktua: Behin erronka identifikatuta, aukeratutako gaiaren inguruan diharduen ikertzaile batekin jarri ditugu harremanetan, eta haren lantokia bisitatzeko aukera izan dute. Horretarako, hitzarmenak ditugu sinatuta hainbat unibertsitateekin: UPV/EHU, Mondragon Unibertsitatea, Nafarroako Unibertsitate Publikoa, Deustuko Unibertsitatea, Ikerbasque eta Digipen.
  • Parekoen topaketa: urtetik urtera ahalik eta ekintza gehien antolatuko ditugu, ikasleak eta ikertzaileak batera jartzeko asmoarekin. Lehen proba pilotua Nafarroan egin zen,  Iruñeko Planetarioan, Nafarroatik parte hartu zuten gazteekin eta NUPeko ikertzaile doktoregaiekin batera.
  • Lantze-fasea. Ikerketa/Proiektu teknologikoa gauzatzea eta amaierako txostena prestatzea. Arazoari irtenbidea emango dion proiektua landu dute, lan-etapa hauek kontuan izanik: informazio-bilketa, hipotesiaren formulazioa, ikerketaren edo prozesu teknologikoaren diseinua, esperimentazioa edo eraikuntza eta probak, ondorioak ateratzea eta txostena idaztea.
  • Azokarako aurkezpena prestatzea: Komunikazio-gaitasunak landu dituzte gazteek fase honetan.
  • Zientzia Azoka eguna: Aste Santuan igaro eta bi astera, larunbat batean, egun osoz, gazteek haien proiektuak azaltzen dituzte handik pasatzen diren ehunka lagunen aurrean. Gazteentzako ahalduntze-ekintza garrantzitsua da Azoka.