Zaindu Maite Duzun Hori! 2

Belaunaldi-transmisioaren etena, globalizazio arina eta herritarren mugikortasunaren ondorioz, gutxiago ezagutzen ditugu herriak antzina baino. Ezin denez maitatu ezagutzen ez dena, eta zulo hori josteko asmoz, proiektu hau martxan jarri da: ZAINDU MAITE DUZUN HORI! Proiektuaren helburu nagusia da gure udalerriko, Erandioko, ondare kulturala, soziala eta naturala ezagutzea, sentitzea eta zaintzea. Proiektua DBHko 1. mailako ikasleekin egingo da. Proiektua garatzeko, honako erronka hau planteatuko da: Erandio eta bertako jendea ezagutzen dituzu? Nola aldatu da gure herria? Gai izango ginateke lurreko produktuekin soilik bizirauteko? Nola zaindu ahal dugu gure ondarea? Erronka horiei erantzuteko, eta curriculum akademikoaren parte gisa, Erandioko industria- eta merkataritza-sektoreen ikerketa teoriko bat egingo da, baita landare- eta animalia-ingurunearena ere. Ondoren, gure inguruko uren, airearen eta lurraren analisia egingo da eta arretaz aztertuko dira Erandioko ondare kulturalak eta tradizioak eta horien bilakaera azken urteotan. Ikasleei ezagutarazi behar zaie zein izan diren eta diren euren herriko balio sozialak eta kulturalak, gure senideek utzi diguten legatuak, non bizi garen eta nora goazen ulertu ahal izateko. Horretarako, hasteko, Erandioko ondare naturalak aztertuko dira. Ikerketa-lan bat egingo dugu udalerriko airearen kutsadura-datuak, uraren kutsadura-datuak, fauna eta flora jasotzeko. Gure ekosistemaren ekologia eta jasangarritasuna aipatuko dira. Aldi berean, geografia eta historia irakasgaian sektore industrialaren mundua eta horren garapena jorratuko dira, lanaren, sexuaren, eta abarren arabera. Jarduera horren osagarri gisa, udalerriko enpresei bisitak egingo zaizkie. Horretaz aparte, Erandioko Udalaren laguntza jasoko da, aurretik existitu diren enpresen datuak eta horien ingurumen-, gizarte- eta lan-eragina ezagutzeko. Bestalde, Erandioko zenbait eraikuntza ezagunetan ikusten diren estilo arkitektonikoak aztertuko dira. Gure tokiko ondarearen arkitektura eta historia ikasi ostean, Erandioko eraikuntza ezagunenen 3D eta 2D diseinuak egingo dira eskalan. Horrez gain, euskal kulturan sakondu da, eta, zehazki, gure udalerrikoan (jaiak, esaera zaharrak, ohiturak…). Hala, Erandioko biztanleengana modu emozionalagoan heltzen saiatuko da; izan ere, haiek partaide izango dira, eta, horrela, herritar zientziako proiektu bat egin ahal izango da. Horrez gain, emakumearen papera ere nabarmenduko da, bai familiaren esparruan, bai lan esparruan, eta Euskadiko gizartearen garapenean izan duen lidergo-papera azpimarratuko da. Gure udalerria hobeto ezagutzeko, ibilbide osasungarriak egingo dira, eraikuntza ezagunenen informazioa biltzeko, bai eta gure inguru naturalari buruzko informazioa ere. Gainera, udalerrian egindako kirolak eta dantza tradizionalak aztertuko dira. Ildo horretan, berriro ere garrantzia emango diogu emakumearen paperari (dantzak eta kirolak soilik gizonek egiten zituzten) eta garai hartako gizartean zuten papera benetan aztertuko da. Oso kontuan hartuko dira prozesu horretan sortuko diren emozioak eta sentimenduetan aldeak dauden herritarren sexuaren arabera. Azkenik, puntu horiek aztertu ostean, lortutako datu eta ondorio guztiak poster batean jasoko dira. Poster horietan udalerriko ibilbideen berri emango da, eta tokiko interes arkitektonikoko eta ondareko puntuak nabarmenduko dira. Horrez gain, informazio ugari emango da ibilbide horretan aurki ditzakegun florari eta faunari buruz. Bestalde, Erandioko eraikuntzarik ezagunenak 3Dan eta 2Dan eskalan inprimatuko dira. Lan hori guztia dokumentu-zorro digital batean jasoko da, ikasleak erregistratu eta ebaluatzeko. Erronkaren ondorio eta amaiera gisa, ikasle guztien artean JARDUNBIDE EGOKIEN DEKALOGOA egingo dute, gure udalerria, Erandio, ezagutu, sentitu eta zaintzeko.