Lauaxeta Ikastolako eta Salesianos Urnietako ikasleek CIC bioGUNE ezagutu dute

Lauaxeta Ikastolako eta Salesianos Urnietako taldeek CIC bioGUNE ikerketa-zentroa bisitatu dute. DBHko 3. mailako bi taldeek 2026ko Elhuyar Zientzia Azokan bisita egiteko saria jaso zuten.

Bisitan, gazteek CIC bioGUNEko instalazioak ezagutu dituzte, eta zentroan lanean ari diren talde zientifikoekin hitz egiteko aukera izan dute. Besteak beste, biomedikuntzaren, osasunaren eta biozientzien arloko ikerketa-lerroen berri jaso dute lehen eskutik, bertan lan egiten duten ikertzaile eta teknikarien eskutik.

Egunak CIC bioGUNEren plataforma teknologiko aurreratuenak ezagutzeko aukera ere eskaini du, azken belaunaldiko ekipamenduekin. Horrela, teknologiak, berrikuntzak eta lan multidiziplinarrak zientzian duten garrantziaz jabetzeko aukera izan dute ikasleek.

Bisitak zubi bat eratu du Elhuyar Zientzia Azokan garatu zituzten proiektuen eta ikerketa profesionalaren artean: behaketa, galderak sortzea, esperimentazioa eta pentsamendu kritikoa ikasgeletako proiektuen eta laborategietako ikerketaren ezaugarri komunak direla erakutsi baitu.

CIC bioGUNEk oso ondo baloratu du esperientzia, eta Elhuyar Zientzia Azokarekin duen lankidetzarekin jarraitzeko gogoa berretsi du, gazteen artean zientzia- eta teknologia-bokazioak pizteko helburuarekin.