Nafarroako 140 gazte baino gehiago bilduko dira Baluarten, 'Elhuyar Zientzia Azoka |Nafarroa Teknozientzia’ ren zazpigarren edizioan

2025/03/31

Larunbat honetan, apirilaren 5ean, Baluarte berrikuntzaren epizentro bihurtuko da, Elhuyar Zientzia Azoka | Nafarroa Teknozientziaren zazpigarren edizioarekin. Nafarroako 15 ikastetxetako 12 eta 18 urte bitarteko 140 gazte baino gehiagok ikasturtean zehar garatutako 44 STEM (Zientzia, Teknologia, Ingeniaritza eta Matematika) proiektu aurkeztuko dituzte. Teknologiaz, zientziaz eta sormenez beteko dute Baluarte.

Elhuyarrek Iruñeko Planetarioaren eta NICDOrekin batera antolatu duen azokaren helburu nagusia da gazteen artean zientzia eta teknologiarekiko interesa sustatzea, etorkizunerako funtsezkoak diren zeharkako konpetentzien garapena sustatuz.

Azokarako sarrera doakoa izango da. Ekitaldia 10:00etan hasiko da, eta Arnaitz Fernandez ETBko aurkezle ezaguna eta meteorologoa izango du gidari. Bertan izango dira Juan Luis García Martín, Nafarroako Gobernuko Unibertsitate, Berrikuntza eta Eraldaketa Digitaleko kontseilaria; Paula Noya, NICDOko Kultura Azpiegituren zuzendaria; eta Jon Abril Olaetxea, Elhuyarreko koordinatzaile nagusia. Azoka bisitatzeko publikoari ateak 10:30ean irekiko zaizkio.

Mundu errealeko erronka eta galderei erantzuteko helburuarekin sortu dituzte ikasleek azokan ikusgai egongo diren 44 proiektuak. Lau orduz, gutxi gorabehera, gazteek beren lanak erakutsiko dituzte, ezagutza zientifikoak eta gaitasun teknologikoak sormenarekin eta berrikuntzarekin konbinatuz.

Parte hartu duten 15 ikastetxeen artean, honako hauek daude:

  • Amazabal BHI
  • Andra Mari Ikastola
  • Askatasuna BHI
  • Biurdana BHI
  • Colegio Luis Amigó
  • Colegio San Cernin
  • CEE El Molino
  • CIP FP SAKANA LH IIP
  • IES JULIO CARO BAROJA
  • IES Mendillorri BHI
  • IES Padre Moret-Irubide
  • IES Plaza de la Cruz
  • Liceo Monjardín
  • Otsagabia DBHI
  • San Fermin Ikastola
  • CanSat (gonbidatuak)

Antolatzaileak

Elhuyar, Iruñeako Planetarioa, NICDO

Babesleak

Nafarroako Gobernua, Eusko Jaurlaritza

Kolaboratzaileak

Aditech, NUP, Nasertic